28 октябрьыште Усталык ушем-влакын пӧртыштышт Марий Элын калык артистше, М.Шкетан лӱмеш Марий драме театрын тӱҥ режиссержо Роман Алексеев дене вашлиймаш лийын. Тудо Театр-влак ушемын проектше кышкарыште эртен.
Роман Алексеев шкенжым театр икшыве улам, манеш. Вет тудын ачаж ден аваже Марий театрыште пашам ыштеныт, сандене рвезе кулис шеҥгелне кушкын, манаш лиеш. Тидат веле огыл, гастрольышкат пеленышт кошташ логалын… А таче тудо, эн ончычак, калыкын йӧратыме артистше. Щепкин лӱмеш театр училищым тунемын пытарымеке, сценыште модаш тӱҥалме икымше ийла гычак ончышын кумылжым налын. Тудо пуйто артист лияшак шочын: кугу кап, мотор йӱк, образыш келгын пурен моштымо усталык… Кокымшо, Роман Алексеев таче – шкенжын ойыртемжым мушо режиссер. Тудо пӱсӧ да келге, тачысе ончышылан келшыше материалым, спектакльым сценыш лукмо у йӧн-влакым кычалеш. Шкеже эре тунемеш, тидын годымак актер-влакын мастарлыкыштым куштымо шотышто шуко пашам ышта.
А тиде кастене, тиде вашлиймаште Роман Юрьевич усталык корно дене эртымыж нерген моткоч оҥайын да чон почын каласкалыш, йодыш-влаклан вашештыш. Тышке толшо-влакын чонешышт моткоч шокшо шарнымаш кодо.

 

Additional information