Моло ийласе семынак теният М.Шкетан лӱмеш Марий драме театрын пашаеҥже-влак 26 апрельыште эртыше Талешке кечын мероприятийлашкыже кумдан ушненыт.
Тудо шым шагат эрдене марий сылнымутын классикше С.Чавайнын памятникше воктеке пеледышым пыштыме гыч тӱҥалын. Тушко погынышо-влак марий тӱняште талешке семын палемдалт кодшо лӱмлӧ еҥ-влакын лӱмыштым эше ик гана ушештареныт, нунын пашаштым умбакыже шуйымо нерген ойленыт.
Кечывал деч вара шагатлан театр воктене Я.П.Майоров-Шкетанлан шогалтыме бюст воктене «Талвий» сылнымут марафон тӱҥалын. Тудо Российыште увертарыме Театр идалыклан да Марий национальный театрын 100 ияш лӱмгечыжлан пӧлеклалтын. Тӱҥалтыш мутым художественный вуйлатыше В.Пектеев ойлен. Тудо Марий театрын йол ӱмбаке шогалме икымше ийлаште Яков Павловичын моткоч кугу сомылым шуктымыж нерген ойырен палемден. Вара самырык артист-влак писательын почеламутшо-влакым лудыныт. Музей пашаеҥ Е.Мочалова архив материалым шымлышыла шинчалан логалше оҥай факт-влак нерген ойлен, С.Чавайн ден В.Колумбын Шкетанлан пӧлеклалтше почеламутыштым лудын пуэн.
Марафоныш ушнышо-влакын корнышт умбакыже шуйнен, нуно РСФСР-ын калык артистше С.Кузьминыхын, РСФСР-ын сулло артисткыже М.Романован, МАССР-ын сулло артисткыже Е.Сошникован, артист да драматург К.Коршуновын, режиссер С.Кириллован … Шарнымаш оҥашт воктене чарнен шогалыныт. Кажныж нерген шарнымаш йоҥгалтын, произведенийла гыч ужашым лудыныт. Российын сулло артисткыже М.Медикова, мутлан, Константин Максимович Коршунов дене пашам ыштыме нерген ойлен, тудын пьесыж почеш шындыме «Пӱрыдымӧ пӱрымаш» спектакль гыч Лизан монологшым лудын.
Марий театр шкенжын талешке еҥже-влакым ок мондо, нунын лӱмышт тукым гыч тукымыш куснаш тӱҥалеш.

 

Additional information

До празднования 100-летия театра осталось