Театрыште эше ик у спектакль сценыш лекте. Тиде марий калык йомак негызеш шындыме паша – «Нӧнчык патыр». Тудым сценылан Н.Кузьминых келыштарен, почеламут корныла дене пойдарен.
Моткочак мотор, шинчам, чоным куандарыше йомак. Йырым-ваш марий тӱс, марий вургем. Поро вийым – Нӧнчык патыр, Кӱртньӧ патыр, Тумо патыр – самырык актер-влак И.Антропов, А.Иванов, А.Тетерин – ӱшандарышын модыт. Нунылан ваштарешла шогышо-влакым - Аждага да тудын кок вуйжо (РМЭ-н сулло арт.-влак Э.Яковлев, А.Асмаев да арт. А.Юнусов), юзо (арт. П.Ефимов) – ончет да тыгайым сеҥаш лийшашлат ок чуч. Но чыла йомакысе семынак, тыштат Поро Осалым сеҥа. Кум патыр, Аждаган мландыйымал тӱняште кучымо кум ӱдырым утарен (арт.-влак М.Воронцова, Е.Александрова, М.Трутникова), нуным марлан налыт, пиалан илышым чоҥаш тӱҥалыт.
Йоча-влак сценыште мо ышталтмым тӱткын эскерат, герой-влак дене мутланымашке рӱжге ушнат. Тугеже усталык группо шонымашке шуын – изи ийготан ончышын кумылжым налын кертын.

 

Additional information

До празднования 100-летия театра осталось