23 мартыште М.Шкетан лӱмеш драме театр калыклан «Салика» спектакльын премьержым темлыш. 1938 ий гыч тӱҥалын, тудо ынде 12-шо гана шындалтын. Черетан постановкын режиссержо – Василий Пектеев.
Аншлаглан ӧрман огыл, марий еҥлан тиде спектакль эре лишыл лийын. Тиде ганат районла гычат тӱшкан-тӱшкан погынен толыныт.
Режиссерын пашаж могырымат, художникын сценым сӧрастарымыж шотыштат ондаксе постановкыла деч ты гана шындыме «Салика» ойыртемалтеш. Тӱҥ герой-влакын образыштымат вес актер-шамыч чоҥеныт. Саликан рольыштыжо ты гана сценыш актрисе Светлана Александрова лектын, Эчук – Иван Соловьев, Марина – Мария Иванова, Чопай – Сергей Данилов. Полат Акпайын образшым Василий Домрачев, Ози Кузиным Олег Кузьминых, Эчан ватыным Светлана Строганова, Терей ватыным Галина Иванова чоҥеныт. Шке ойыртемжым кычалаш тыршен Иван Иванычым модшо Алексей Сандаков.
«Салика» эре музыкальный комедий жанр дене шындалтын. Ты гана спектакль мучко «Марий кундем» калык семӱзгар оркестр шоктен. А сӱан сценым «Марий памаш» калык фольклор ансамбль сӧрастарен.
Тиде тургымышто «Салика» эше ик гана 25 апрельыште сценыш лектеш. Кӧ ужын шуктен огыл, толза, вучена.

 

Additional information

До празднования 100-летия театра осталось