26 январьыште, ончылгоч увертарыме семынак, сценын озаже театрын хужожественный вуйлатышыже Василий Пектеев ыле. Тудо 65 ийым темымыж лӱмеш бенефисым эртарыш.
Марий Эл искусствын сулло деятельже, Марий Эл Кугыжаныш премийын лауреатше В.Пектеев – уста марий режиссер. 2000-ше ийла тӱҥалтыште тыгак Российысе тӱрлӧ театрыште спектакль-влакым шынден. Но тудо эше сылнымут аланыште шкенжым терга, «Омо» почеламут да «Мӱкш тӱня марий» прозо дене возымо книгам савыктен луктын. Тыге усталык касшымат лачшымак шкенжын возымо произведенийжылан пӧлеклен.
Концертын икымше ужашыштыже, сцене гыч кайыде, шкеж дене палдарыш, почеламутшо-влакым лудо, возымо мутшылан муро-влакым мурыш. В.Пектеевын шомакшылан эн шуко семым Т. Ямбердова возен. Тыгак И.Егоров дене пырля возымо муро уло, икмыняржылан семым автор шкеак келыштарен.
Василий Пектеевын почеламут возышо семын ойыртемжым шке жапыштыже Семен Николаев тыге палемден: 1) …тудо кызыт, лач тиде татыште акылым да шӱмым когартарыше шижмашым кагазышке пышта… 2) В.Пектеевын рифмыже – почеламут кӧргыштӧ… - корно мучаш деч ончычак ме тудым колына… 3) шинча дене лудмо годым Василий Пектеевын ритмикыже пудыргымым пешакат ужат, но колыштмо годым тидым йыклык от шиж. Лач пытартыш шонымашыже пеҥгыдемдалтмым мы ужна тиде гана сценыште тудын шке почеламутшым шкеже лудмо годым.
Кокымшо ужашыште касым театрын артистше-влак Марина Воронцова, Иван Соловьев, Иван Смирнов сылнештараш полшышт. Шуко шоктыш «Марий кундем» калыксемӱзгар оркестр. Чыла муро тудын почеш йоҥгалте. Оркестр почеш мурымым фонограмме почеш мурымо дене нигузеат от таҥастаре. Семмастар-влак дене иквереш ыштыме годым мурызын йӱкшӧ веле огыл, чонжо почылтеш. Таклан огыл кажне муро деч вара залыште шинчыше калык кужу жап совым кырыш.
Сценыш шукын саламлаш кӱзышт. Толыныт эсогыл К.Иванов лӱмеш Чуваш академический драме театр гыч артист-влак. А теве Марий Элын культур, печать да калык-влакын пашашт шотышто министрже К.Иванов Москва гыч видеосаламлымашым колтен (тиде жаплан лач командировкышто лийын). Константин Анатольевич В.Пектеевым театр искусствын кугу мастарже, шке кундемжын кугу патриотшо манын палемден. Тазалыкым, усталык аланыште у деч у сеҥымашым тыланен.
Театрын артистше-влак, тӱшкан сценыш лектын, юбилярым уло театр коллектив лӱм дене саламлышт.

 

Additional information

До празднования 100-летия театра осталось