18 январьыште А.Спиридоновын «Югорно» («Песнь о вещем пути») эпосшо негызеш шындыме тыгаяк лӱман спектакль сценыш лекте. Поэт Анатолий Мокеввын кусарыме марий вариантше почеш инсценировкым Василий Пектеев ыштен, шкежак режиссер-постановщик (тудлан режиссер Роман Алексеев полшен), художник-постановщик – Владимир Королев, семым Сергей Макэмари (Маков) возен.
Аншлаг лиймылан ӧрман огыл, вет калык тудым чон вургыж вучен. Легенде, йомак, муро, калык ойпого радамыш пурышо моло произведений негызеш возалтше ты эпический поэме марий калыкын курымла вошт эртыме корныж дене кылдалтын. Мландывалсе илышым Сандалыкын виктарыме, тушто улшо шуко калык коклаште марийын шке тӱсшым, ойыртемжым мумо дене кылдалтше оҥай сценографий, кугезына-влакын кӧргӧ патыр виян улмыштым почшо муро, сем, моткочак оҥай да сылне вургем, актер-влакын чоным пыштен модмышт – чыла тиде залыште шинчышым сценыште мо да кузе лиймым тӱткын эскераш тарата.
«Югорно» - чынжымак, кугу монументальный паша, тудо театрын таче кугу творческий кӱкшытышто улмыжым пеҥгыдемден ойла. Да уло тудым умылышо ончышо – тидат мыланна пеш шерге. Ты произведенийым марла мучашдымын лудаш да колышташ лиеш – тунар чоным вӱчка шочмо йылме. Тудым Василий Пектеев симфоний дене таҥастара.
Тыге, «Югорно» сценысе корныш лектын. Тек тудо вияш да кужу лиеш.
Спектакль РФ культур министерствын ойырымо грант окса дене шындалтын.

 

Additional information

До празднования 100-летия театра осталось