Калык артистым шарналтен
Лач 100 ий ончыч тиде кечын, 9 декабрьыште, Оршанке районысо Кыдал Пуял ялыште шуко шочшан кресаньык ешыште РСФСР-ын калык артистше Степан Кузьминых шочын. Тудо Марий театрын икымше профессиональный артистше-влак кокла гыч – иктыже. Марий театр искусствышто тудо икымше Россий кӱкшытан тыгай кугу званий дене палемдалтын. Лач тудо артист-влаклан эрвел кундемысе марий-влак деке корным почын. Да сценыштыжат тудо икымше лийын, манаш лиеш - марий, руш, совет да вес элласе классикыште, кызытсе драматургийыште шукыжо эре тӱҥ рольым модын.
Тидын нерген ты умыр теле кечын Марий театрыште кызыт ыштыше режиссер, актер, композитор да художник-влак Степан Кузьминыхын Шарныктыш оҥаж воктене эше ик гана шарналтен ойленыт. Нунын коклаште Степан Иванович дене пашам пырля ыштен шуктышыжат лийыныт. А самырык-влаклан кугу актер нерген колышташ пеш пайдале ыле.
А кастене Пуялыште Шарнымаш кас лиеш. Тушто эн ондак С.Кузьминыхын илышыже да усталык корныж нерген видеофильмым ончыктат, М.Шкетан лӱмеш драме театрын артистше-влак Степан Ивановичын модмо спектакльла гыч ужашым, муро-куштымашым пӧлеклат.
Кугу актер нерген шарнымаш калыкыште да чумыр марий искусствышто курымеш илаш тӱҥалеш.
(С.Кузьминыхын илышыже да усталык корныж нерген радамлын лудаш лиеш:  https://shketan.ru/mari/theatrepeople_mr/vetrans-mr/1017-kuzminyh.html 

Additional information