Театрын пӱтынь труппыжо, манаш лиеш, кызыт А.Спиридоновын эпосшо почеш «Югорно» спектакльым сценыш лукташ ямдыла.
Сценарийын авторжо да режиссер-постановщик – В.Пектеев, режиссер – Р.Алексеев, художник постановщик – В.Королев, композитор – С.Макэмари.
Эпос - калыкын эртыме корныжым радамлен ончыктышо кугу произведений. Тудо легендыште, преданийыште, йомакыште, мурышто, калыкмутышто … аралалтше ден илышыште чынжымак лийын кертше материал негызеш возалтеш. Тыгак шочын писатель Анатолий Спиридоновын «Югорно» эпический поэмыжат. Тудым марлашке пеш чаплын уста поэт Анатолий Мокеев кусарен.
Тыгай эпос улмо годым тудым сцене гоч спектакль семын модын ончыкташ, манмыла, Юмыжак пӱрен. Тиде кугу пашам шукташ М.Шкетан лӱмеш Марий драме театрын таче вийжат ситыше, кумылат уло.
Спектакльым ямдылаш сценографий гыч тӱҥалме. Российысе театр искусствышто сайын палыме художник В.Королев, драматургий материал дене палыме лиймеке, марий калыкын историйжым шымлен лектын, утларак кугу тӱткышым кугезына-влакын кокла курымлаште чийыме вургем ойыртемыштлан ойырен, тидын годым этнограф-влакын шымлымашыштлан кумдан эҥертен. Тыгак сурт коклаште кучылтмо тарман, саркурал, семӱзгар-влак шинча ончылан сӱретлалтыныт. Чыла тидым спектакль годым сценыште ужаш йӧн лиеш.
Спектакльыште Поро ден Осал вашла кучедалыт. Икымше тӱшкаште Салий (тудак варажым Нӧнчык Патыр, Важык нер, Ош Пондаш), мудреч Алмакай, Чумбылат патыр, Чучка ден Чорай, Акмазик улыт. Нунын да пӱтынь калык ваштареш шогат Пектемыр (тудак вараже Тӱкан Шур), Таргылтыш. Шем вийым сеҥымешке, калыклан шуко орлыкым чыташыже перна. А тудым утарышыже – Акмазик. Лӱддымӧ рвезылан осал Пектемырын Унавий ӱдыржӧ полша. «Титаканже» тыште – йӧратымаш…
Спектакльын премьерже 20 декабрьыште лиеш.

 

Additional information

До празднования 100-летия театра осталось