Новости театра

3 гыч 11 декабрь марте М.Шкетан лӱмеш Марий кугыжаныш драме театрын Башкортостан да Татарстан республикылаште кугу гастрольжо эрта. Тудо театрын 100 ияш лӱмгечыжлан пӧлеклалтын. Уфасе «Нур» кугыжаныш татар театрыште «Салика» (С.Николаев), «Оръеҥ мелна» (А.Волков), «Илена-йӱлена» (Ч.Секей) спектакль-влакым, тыгак йоча-влаклан «Лось Ихтыго» ден «Богатырь из теста» йомакым артист-влак «Кугу гастроль» федеральный театр программе кышкарыште модыныт. «Саликам» тыгак Нефтекамск оласе марий-влак шокшын вашлийыныт.

29 ноябрьыште пӱтынь марий общественность М.Шкетан лӱмеш Марий кугыжаныш драме театрын 100 ияш лӱмгечыжым палемден. Тиде кечын республикысе газет ден журнал-влак театрлан пӧлеклалтше номерым луктыныт. А лӱмгече пайрем касыште залыште правительство вуйлатышын алмаштышыже, министр, депутат, марий калыкын эн уста еҥже (поэт-писатель, композитор, художник, артист) да театрым йӧратыше зритель-влак шинченыт. Нунылан шинчаваш сценын ончыл ужашыштыже артист-влак верланеныт. Тиде кастене молгунамсе семын пашам ыштен огытыл, нуно шкешт нерген сулен налме поро шомакым колыштыныт, саламлымашым налыныт.

14 ноябрьыште С.Пектеевын сценарийже почеш возымо да тудынак шындыме «Йыван Кырла. Путевка в жизнь» спектакльын эскизше дене национальный драматургий фестиваль почылтын. Репертуарыш Калмык, Татар, Чуваш национальный театр-влакын спектакльыштым пуртымо. Тидыже мемнан ончышылан марий театр-влакын пашаштым вес театр-влак дене таҥастарен ончалаш, аклаш йӧным пуа.

Теве тудо кече толын шуо – 29 ноябрьыште М.Шкетан лӱмеш Марий кугыжаныш драме театр шкенжын шочмо кечыжым палемда. А тенийсе шочмо кечыже тыглай огыл. Марий кундемыште ыштыме икымше Марий театрлан – 100 ий! Шочмо кечет дене, йӧратыме марий театрна! Пайрем дене артист, театрыште тыршыше чыла пашаеҥ-влак!

11-18 ноябрьыште театрыште Национальный драматургий фестиваль эрта. Тудын кышкарыштыже драматург-влаклан семинар-лабораторий пашам ышта. Икымше кок кечын ойырен налме драматургий материалым автор, театровед да режиссер пырля лончыленыт. Тидлан лӱмын критик-влакым ӱжмӧ. Павел Подкладов Москва гыч, Дина Давлетшина Уфа гыч толыныт.

Additional information